L'atro diya fazié examen de ran de catalán en Barzelona. Cuan rematemos a preba, a examinadora mos dizió que podeba-mos emplir una fuella con datos estadisticos. Yeran fendo un estudeo sobre o tipo de chen que fa istos examens de ran. Por zierto, que nomás fendo una guellada ya se'n beyiba que la chen yeran cuasi toz funzionaires, de meya edat, que eban rematau o COU antis d'o 92, que be-de estar cuan fazioron tabla rasa ta donar o ran C.

En prenzipiar a encuesta meteba dos preguntas:

1. Que luenga s'emplegaba en a tuya casa cuan yeras chicorrón.
2. Que luenga emplegas en o triballo, y con os amigos.

Ta emplir as casellas, bi eba tres ringleras, y un listau de codis con luengas de tot lo mundo. Dende l'Amazigh dica...tachán, l'aragonés. Se podeba meter l'aragonés como una d'as rispuestas. Isto, aqui a costau de casa nuestra...mientres que en casa nuestra iste listau de luengas ye impensable, profés. Poco más que saben en as instituzions ofizials que bi ha una cosa que se diz anglés y atra franzés y de begadas meten bella coseta en istas luengas ta que beigamos o modernos que son.

Etiquetas: aragonés, catalunya, aragón, luengas

M'escribe Dani de Charrando un correyo ta dizir-me que a nieta de tío Baitico de Bielsa ha ganau un concurso literario

Ola a tots,
Ta si tos interesa, tos informo de que la ganadora del concurso literario de l'instituto (modalidat Narratiba en Aragonés) ha estau LORENA SEIJO GARCÉS (nieta del tío Baytico de Bielsa), per la suya obra en aragonés belsetán "La mía bida". Iste relato narra la istoria d'una parella d'enamoraus en es días de la guerra zibil, chuntán informazión istorica prezisa dan una ficzión sentimental ben bonica.
Las demés modalidats han quedau desiertas.

Memorias,
Daniel

M'intresa siñalar a transmisión d'a luenga, como Baitico ha feito con o suyo aimor ta la luenga d'os suyos debanpasaus, que a suya nieta charra y s'aime a ista luenga chicota nuestra a la que atros que la disprezian quieren morir. O patrimonio de l'aimor a las radizes, a os alazez d'as identidaz y as luengas ha feito que Lorena charre, escriba y cultibe l'aragonés.

Etiquetas: aragonés, bielsa, belsetán, premio, literatura

O benién biernes 27 de chunio, feré a presentazión d'o libro "Em dic Mireia (i el meu cony es diu Carlitos)" dels autors de Benavarri Manel Riu y Mir Roi. Me fa muito goyo fer ista presentazión

1. porque bienen os autors
2. porque son esfensors d'as luengas d'Aragón
3. porque ye unatra manera de refirmar a Manel, que ye uno d'os que sufre os ataques y denunzias d'a Facao
   
4. porque leban muito tiempo autibos en Internet
5. porque o libro ha feito o salto de Internet ta o paper
6. porque en ixe camín han dixau sospresos a muitisma chen
7. porque o libro tiene calidat
8. porque ye un "gustet gustet" que te conbiden a fer una presentazión en aragonés, que continará en aragonés ribagorzano y rematará en catalán

Antimás, Aragonéame, patrozina una sospresa per toz os que tos amanez a la siede de Nogará.

Etiquetas: mireia, galindo, franja, presentación, libro

Ayer tenié o goyo de fer a presentazión de "Em dic Mireia (i el meu cony es diu Carlitos)". Como no podeba estar d’atra manera, charremos no nomás d’o libro, sino d’a lei de luengas, d’a FACAO, d’a querella, d’a situgazión de lo catalán en Aragón, d’as luitas que mos quedan por concarar y d’a reyalidat d’un Aragón trilingüe. Grazias a Nogará por ufrir o local suyo, porque no ye fázil trobar un puesto en Zaragoza ta presentar un libro en catalán. Grazias a Manel Riu y Mir Roy, por a suya presenzia y fer tan intresán a presentazión d’o suyo libro. Grazias a José Antonio Bergua, de Benavarri, que mos fazió una güellada amanada y sinzera sobre a luenga en o suyo lugar y a dificultad d’a suya perbibenza. Y grazias a toz os que biniez ayer ta sentir-nos charrar, y fer-nos reflexionar a toz sobre a lei que se mos biene denzima. Me premito escribir (manimenos) a presentazión que fazié de l’auto. Güé, cuan he plegau a casa mía, Laura, Mireia y Carlitos ya no i yeran, creigo que marchaban ta la placha. O no.

Semos bibindo un inte prou importán, asabelo d’importán...istos son diyas istoricos, que se’n remerarán por años y años. Se puede crebar una biella istoria, se puede cambear a istoria. Profés que no charro d’a Eurocopa, encara que o parixca. Soi fablando d’a lei de luengas.

Podemos pensar que a lei de luengas se aprebará en setiembre d’iste año. D’indizios en tenemos guaires:

• O bizepresidén d’Aragón José Ángel Biel ha dito que ha lei de luengas s’aprebará. Dimpués de l’estiu, pero que s’aprebará. Y Biel manda asabelo.
• Os Facaos, Roldechobens, PP’s y atros parixius, han quitau as banderas baturras t’a carrera. Mesmo han dito una data, antis que ningún.
• Aconsellera de Cultura ni mete, ni quita, ni fica, ni saca...y no diz cosa. "Quieta en la mata".

Puestar, allora, que en setiembre a lei de luengas esdebienga d'a birtualidat enta la reyalidat. Como a nuestra quiesta Mireia, creyada por Manel y Mir y que dimpués de pasar de reyal a birtual, dentre uns y zeros, agora torna a pasar atra begada a la reyalidat. D’a web, t’o paper, como antis eba pasau de l’esmo y o prexín d’istos dos ribagorzans enta lo rete.

Ista Mireia cochina mos esplica as suyas istorias sexuals, os suyos emboliques politicos, as suyas basemias con as luengas..y con os idiomas. Y como no ye fázil charrar de tot isto, de politica, de sexo, y como no ye fázil ser a la begada presona birtual y reyal, Manel y Mir dezidioron embolicar-lo tot, y enreligar reyalidat, birtualidat, sexo, politica y luenga, y educazión ta creyar a la suya (la nuestra) Mireia, o suyo Carlitos y toz os atros presonaches que pueblan o libro.

Ista nobela que estió blog, que estió bida, tiene barios rans de leutura. Y no nomás quiero dizir que ye una nobela que se puede leyer con una man, o con dos, pende d’as ganas que tiengas de fer-te goyo a ti mesmo. Tamién tiene barias leuturas, como o Nombre de la Rosa, d’an quitan bels nombres, o bel nombre. Como en o Nombre d’a Rosa bi ha un ran de leutura fázil, d’abenturas, dibertida...y unatro que enreliga una teoría sobre o mundo, o país, a luenga, a politica y as rilazions. Por zierto, que agora que fablo d’o Nombre d’a Rosa, me remero que en iste libro bi ha bellas frases escritas en ixo que os que "No hablan catalán" diz que ye baischaragonésorientaldelestedeltotabansdepllegarentacataluña. Concretamén ixo que fabla Salvatore, o brillante aduyán d’o zireller.

En fin, que reyalidat y birtualidat se mezclan en ista nobela, pero o que ye reyal ye que güe tenemos a Manel y Mir con nusatros. Mireia y a suya mesacha, Laura, no han quiesto benir y parixe que s’han quedau en casa mía. A lo menos mos han dixau bel regalet en forma de canzions. Asinas que aprobeitemos a Manel y Mir, que os tenemos aquí, porque ellos sí fablan catalán, y como dizen en l’epilogo d’o libro, tamién son aragoneses.

Etiquetas: aragonés, catalán, aragón, luengas, ley, mireia, franja