Trobada Fabloggers 2008

Iste año a Trobada de Fabloggers que tan bien preparó o zaguer año Mensachero torna con muitismas nobedaz y sobre tot, con más presenzia en a carrera. Copio d'a pachina d'a Trobada.

Biemplegaus a la "II Trobada de Fabloggers". Dezaga queda toda una añada de notizias, post, nuebos blocs, libros, publicazions, y una ripa de cosetas ta fer onra a l'aragonés. Ta zelebrar que continamos bibos, que continamos gronxiando-nos, escribindo y postiando en a luenga que mos amostró a fablar, u que aprendiemos años dimpués, iste año a Trobada se presenta con muitas nobedaz. Ta prenzipiar ,si leyemos o programa, beyeremos que a Trobada se ferá en dos diyas. O primero, de tardis, mos achuntaremos a charrar y fer unas buenas bieras como a zaguera añada. A l'atro diya, mos aspera una chornada importán. Marcharemos a o salón d'a FNAC t'ascuitar una buena charrada respeutibe a o papel d'as luengas minorizadas en a bloggosfera y os nuebos meyos dichitals y a continazión se i ferá a entrega de premios ... ¿Qué premios? m'eba oblidau dezir-lo, unatra d'as nobedaz d'iste año ye que se ba a parar un concurso "online" de microfalordias  en que podrez partizipar toz os que queraz, y en a luenga aragonesa que tos cuaque, leyez as bases ta beyer cómo será o reparto d'os cuasi 300 euros en premios. Aspero que no i manque dengún y que tos animez a partizipar-ie.

Me fa goyo tamién que aragoneame patrozine un d'os premios d'o relato, y que me aigan encargau fer a charrada d'a FNAC sobre as luengas minorizatas, os meyos dichitals y os blocs. Quedaz conbidaus a partizipar en o concurso de microfalordias y a benir a l'auto d'o sabado 22 en o salon d'autos d'a FNAC, a las 19.30