A Biquipedia plega enta os 10.000 articlos

Y una buena ripa más ya. En o zaguer mes d’agosto a Biquipedia ha plegau a una fita importán. 10.000 articlos. A Biquipedia ha alcanzato os 10.000 articlos o diya 21 d’agosto de 2008, con l’articlo Monesterio de San Per de Ziresa.

Ixo ha feito que en a lista sistematizata de luengas con sistemas libres de wikipedia, l’aragonés siga ya en o terzer grau que arrocla a luengas tan importans (y subenzionatas) como l’euskera, o galego, o mesmo luengas ofizials estatals como l’estonio o lo croata. Ye de dizir que ista colla de luengas ba dende as luengas con 10.000 articlos dica ixas que tiene cuasi 100.000. De feito l’aragonés ye a zaguera luenga d’ista lista, pero a chicota (pero prou boluntariosa) colla de chen que fa dentradas en a Biquipedia, fará que luego ista zifra se quede curta, y s’amane a luengas como l’ozitano (14.000), l’asturiano (11.000) o lo letón (17.000).

Ye importán tamién que o ritmo de creximién ha estau progresiu y mientres que os primers mil articlos se fazión en seis meses, os zaguers mil (de 9.000 a 10.000) s’han feito en mes y meyo, y amás, en estiu.

L’aragonés ye una luenga minorizata (asabelo de minorizata) y atamás d’ixo, ha puesto plegar a una zifra prou intresán d’articlos en a Biquipedia, con un ratio fablans/dentradas prou superior a atras luengas, como lo castellán o lo catalán. Ye un triballo quedo pero que ha feito d’a Biquipedia un d’os siñals de l’aragonés en Internet.

Copio o que diz a Biquipedia en a suya portalada, y tos conbido a fer-ne caso y fer posible que l’aragonés crexca tamién en o rete, asinas como o conoximién.

Wikipedia ye una enziclopedia libre e multilingüe. O proyeuto en idioma aragonés escomenzó lo 21 de chulio de 2004. Bi ha wikipedias en muitas atras luengas d’o mundo e belunas relazionatas con l’aragonés:

Se charras aragonés e creis que estarba bien de tener una Enziclopedia libre en a tuya luenga, alabez tú puez fer-la.
Ta más informazión, bes ta la pachina d’Aduya, e tamién ta las wikipedias en anglés u en español.

Tamién puez beyer a portalada e colaborar con Biquipedia en a tuya bariedat dialeutal:

ansotano · belsetán · benasqués · cheso · chistabín
fobano · ribagorzano · sobrarbés · tensino