Se muestran los artículos pertenecientes a Noviembre de 2007.
05/11/2007
Plataforma d'esfensa d'a luenga aragonesa
L'atro diya se fazió publica a creyazión d'a Plataforma d'Esfensa d'a Luenga Aragonesa . A soziedat zibil ye enzetando en os zaguers tiempos bellas iniziatibas ta no dixar morir ista luenga que aspera una lei que no en plega nunca. Dizen en o manifiesto de presentazión:
A siguién plataforma que aquí presentamos ye creyada por una colla de personas de diferens sensibilidaz y asoziazions embrecadas con a esfensa de l’aragonés. Sin garra afán de personalismo ni protaganismo por parti d’a suya asoziazión ni d’el mesmo. A la fin un mobimiento apolitico y a-ideolochico con l’unico ochetibo de rebindicar a ofizialidat de l’aragonés, a sozializazión y a normalizazión d’o suyo emplego en cualsiquier puesto d’Aragón.
Somos asistindo a la zinquena prebatina por parti d’o Gubierno d’Aragón de redautar y aprebar una lei de luengas que dignifique y faiga tener o dreito d’emplego ta la nuestra luenga, l’Aragonés, y o catalán. Ta nusatros ye o zinqueno intento d’engañar-nos y mantener-nos callaus tanimientres se muere a luenga aragonesa.Debán d’istas perspeutibas y d’una manca de respuesta sozial, que muitas begadas ye a desincusa d’os politicos aragoneses, creyemos menister formar ista plataforma. Una plataforma ta mirar de fer autos de presenzia dentro d’a soziedat aragonesa, aizions dreitas, espeutaclos, autibidaz… en cheneral aizions bisteras que remeren a la soziedá aragonesa que les son engañando, que les son amagando a reyalidá sozial d’Aragón y que os politicos aragoneses quieren que muera a luenga aragonesa. Muitos exemplos tenemos ta contrimostrar-lo, pero más en zagueras, sabemos que os politicos son en contra de l’aragonés; y no ye pasibidá sacar cartels bilingües ta meter-los monolingües, nian menzionar o nombre d’as dos luengas minoritarias en o nuebo Estatuto d’Aragón, amagar istas dos luengas en a rezién creyada “Televisión Aragonesa” mesmo plegando a aplazar documentals por considerar-los de politicos,…
Si quiers rezibir más información u meter-te en contauto con nusatros fer-nos plegar un e-mail en: n esfensadelaragones(Arredol)gmail.com
Más en a suya pachina web http://pea.blogdns.net/
18/11/2007
O chuego d'as esferenzias 2
Mos esplican en Conzello de Zaragoza unatro trango entazaga d'o conzello de Zaragoza. Mos ne explican en "O chuego d'as esferenzias 2 ". En iste caso ye a Fuella d'o boluntariato ha que ha estado retallada ta que no amuestre ixa luenga que no dixan esistir.
20/11/2007
Presentazión academicos d'onor de l'Academia, o diya 24
O prosimo sabado 24 de nobiembre se fará en a cambra "el croissant" d'a siede d'o Gubierno d'Aragón en Zaragoza (Pº María Agustín), a las 12:30 oras, una presentazión y omenache a os miembros d'onor de l'Academia de l'Aragonés: Rosario Ustáriz, Nieus Luzía Dueso, Juan José Guillén, Artur Quintana y Brian Mott. Ye un auto ubierto a tot o publico, que contará con a presenzia d'o Bizeconsellero d'Educazión y Cultura d'o Gubierno d'Aragón, Juan José Vázquez.
Asinas fazión saber a Artur Quintana o nombramiento dende l'Academia en aragonés ribagorzano:
Estimau/ada amigo/a:
S’acaba de cumpllir el primer an de bida de la nuestra entidat que, coma ben sabets, ba naixer al II Congreso de l’Aragonés, feto a Zaragoza en l’estiu de 2006 y aon se ban aprobar els suyos Estatutos y se ban triar els primers miembros numerarios.
Dimpués de prinzipiar a desembolicar bells treballs de documentazión, imbestigazión, codificazión y socializazión arredol de l’aragonés y els suyos dialectos, credem que ha arribau la ora de fer un omenache a bellas personas de las més siñaleras en l’estudio, la dignificazión y la defensa de la nuestra lluenga: Nieus-Luzía Dueso, Juan José Guillén, Brian Mott, Artur Quintana y Rosario Ustáriz.
Per aixó, tos combidam a que partizipets en l’acto d’omenache que se fará el día 24 de Nobiembre, a las 12:30 h., en el Salón de Actos d’el Gobierno de Aragón (Paseyo Mª Agustín, 36, Zaragoza), a ditas personas y, dan ellas, a la lluenga aragonesa y a’ls suyos dialectos.
En Zaragoza, a 11 de Nobiembre de 2007
Manuel Castán Espot
Presidén de l’Academia de l’Aragonés
29/11/2007
Fendo orella torna a Radio Topo
Con a tornada de Radio Topo torna tamién a programazión en aragonés. Mosica, actualidat, contrainformazión, entrebistas... de raso en aragonés. Nuebas bozes, nuebas seczions.
Toz os biernes de 19'00 a 20'00 oras en Radio Topo 101.8 FM.
Agora tamién con un blog: http://fendoorella.wordpress.com
30/11/2007
O regalo perfeuto ta istos nadals. L'onso Nabar
Nabar apareixió en as altas tucas d'Euskal Herria, en os Pirineus. Apareixió.
¿D'án ye naixiu? No lo sabemos.
¿D'án benió? Ixo lo sabemos: de luen.
¿De luen, un onso choben?
Bien de luen, prou que sí, porque sabe cuentos de tot o mundo. Cuentos que aprendió d'os onsos grans que yeran plegatos en estas montañas.
Tien ixa madurez, y en tien prou: no deseya creixer más.
Nabar, de difízil superar: conta cuentos, sabe fablar.
Nabar, onso sin par: en siet idiomas os cuentos te podrá contar.
Nabar: o nuestro chiquet onso, o nuestro gran cuentista. Nos conta cuentos de tot o mundo en euskara, oczitano, aragonés, catalán, castellano, franzés y anglés.
Nabar, l'onso ta abrazar: prene-le a man y un cuento t'ha de contar
Nabar, afalagador: ladrón de miel, cómo ha d'estar dolz un onso.
Nabar charrín meloso, ¡cuánto cuento tiene este onso!
Podez mercar-lo en Nogará y en o Ligallo y tamién en a suya pachina web: http://www.nabar.com/an/ an podez tamién baxar a resta d'os cuentos en aragonés y en as atras seis luengas que charra l'onset.
