Güei, primer de mayo, os sendicatos más grans fan a fiesta d'o triballo. Como en os tiempos d'a dictadura. Os atros, os que no reblan, fan una chornada de luita y borina contra a precariedat en o triballo, a explotazión o lo trancamiento de interpresas , d'as que, a diya de güei, Aragón en tien de sobra. Mildred, Ercros,...exemplos bibos de que as politicas d'aduyas a las interpresas pribatas nomás sirben ta fer-las crexer, y nunca ta aduyar a os triballadors.

Güei, primer de mayo, se remera l'asesinato de zinco anarquistas, como bien esplican en  Entre Nómadas. Son as suyas muertes, y as d'atros muitos, as que amonico han feito que s'aconsigan millors condizions ta os achustatos. Güei, por o renunzio, expreso o implizito d'os triballadors, as condizions prenzipian chino chano a tornar entazaga. A bibienda, os produtos alazetals puyan de pre, pero os chornals no. Os achustes ya no son flesibles, son aleatorios. A esplotazión en bels seutors laborals se prautica de contino, y a baixada d'os chornals, en espezial ta bels coleutibos como os inmigrans, ye moneda de cambeo.

Güei, primer de mayo, beyeremos a os liders sendicals cacariando. Güei, primer de mayo, beyeremos conzentrazions minoritarias que fan perbibir o sentiu d'iste diya. Güei, primer de mayo, no ye día ta zelebrar cosa, ye chornada de luita. Una más. Un diya más. Ye diya a diya como s'amilloran as condizions, como se fa a dinnida perbiba, y como se fa un poder por forachitar la esplotazión de casa nuestra. Ye a reboluzión cuticana a que aconsigue efeutos. Ye l'estau d'alerta perén o que fa que no continemos estando carne de cañón. Güei, ye un diya más contra a precariedat y a esplotazión. 

Etiquetas: 1demayo, laboral, triballo, sendicatos, UGT, CCOO, OSTA, SOA, CNT, CGT, luita, precariedat

Antis que ixo, una nota. O reportache "Creciendo en aragonés", que eba a emitir-se en Aragón Televisión iste zaguero domingo a las nueu d'a nuei, ha estau aplazau "sine die". 

Etiquetas: AragónTV, aragonés, fabla, 60M

Te contienes. O mundo empenta contra o barranco. A belozidat t'imple a cara de puntos negros. Son chiquetas fuellas que te golpean. Tot conspira ta que o gas prenzipie a emplir-lo tot. Ye prosimo l'inte en que esclate, parixe prosimo, pero te'n aturas. Ye ixa paret de continenzia o que fa suportar estoicamén. En o fundo, nomás cal que tornes a guellada ta no bier. Ta no creyer. Porque o mundo ye tan gran que as chiquetas barallas se tresbaten en as gransa guerras. Cada auto eroico suposa una chisla d'augua en un ozeando azul y berde. Royo y amariello. En o fundo, o camín contina, y contina, dende as puertas bataleras.

Pero o que no, no. Y a Javier Mendívil creyador de Aragon es así y aragoneria, bloguero en Pasa pues, l'han plaxiato. No ye nomás ixo, sino que l'han feito ta creyar o conteniu d'una paxina ofizial d'o Gobierno d'Aragón. Profés, bella presona ha cobrau por copiar y pegar. Ixa presona, profés, no ha estau Mendívil. Lo rezenta él con pruebas y fotos, y tamién Mariano ,o Jio que se'n fan eco.

Etiquetas: rabia, rasmia, piratería, Aragón, pasapues

Dende fa uns diyas ye funzionando o ranking de blogs en aragonés Alianzo. Por l'inte estamos nomás tres apuntatos, por o que si tiens un blog en aragonés te conbido a inscribir-te y fer que a blogosfera en aragonés tienga bella cosa más de presenzia en o rete.

O ranking ye aquí .

Ta apuntarte cal que en baigas ta aquí .

Etiquetas: internet, aragonés, ranking, alianzo, blog

Etiquetas: aragonés, ACA, academia, fabla, luenga, idioma

Aprobeitando que  blogia ye fendo mudanzas (que siga ta bien), pencho informazión d'o III Asalto Contracultural en Zaragoza . Iste año, en o Camín d'o Bado, 2ª Trabesera, a o costau d'an yera a nau de Canal 44. Aquí en Google Maps .

Etiquetas: okupazion, asalto, contracultura, cultura, conziertos, charradas, tallers, zaragoza, okupa

Como rezentan en a pachina de Aragón Televisión y en o suyo blog Aragón en el Medio ista tardi dende las 19.30 podremos bier o reportache sobre Mauthausen que fazié ta o programa 60-M.

Casi mil aragoneses estioron prisioners d'os nazis astí tras estar declaraus apatridas por o diutador Franco, que colaboró asinas en l'esterminio d'os republicans españols que eban teniu que marchar enta Francia en acabar a Guerra Civil. 6000 españols y 700 aragonseses murioron en condizions infrahumanas en o campo de Mauthausen y en siniestras instalazions que dependeban d'o campo como Hartheim, Ebensee o Gusen.

En Barcelona se i troba l' Amical de Mauthausen asoziazión que arrocla a deportaus perbibiéns a familiars y que preba d'alzar a memoria y estendillar-la.

Etiquetas: nazis, Mauthausen, Aragón, Televisión, España, Franco, República, exterminio

Me nimbia dende Chobenalla Aragonesista l'enrastre á o bideo d'os inzidens d'o sabado en a Plaza de toros de Zaragoza. No ye a unica bersión de que disposo, porque dende Chunta tamién m'han rezentau a chugadeta. Por un costao s'afirma que tres presonas pencharon una  pancarta y estioron agredidas y cuasi abatanadas, por l'atro, que prebaban de crebar o mitin y que ixas tres presonas estioron as primeras en agredir.

A istoria ye que os feitos d'o sabado son un trango más en o prozeso de crebamién d'o nazionalismo d'izquierdas aragonés. O camín enta la moderazión d'os mensaches de CHA ha rematau forachitando a las presonas mas radicals, dica la cucha y dica o nazionalismo-independentismo. En o mesmo prozeso, han rematau plegando enta CHA presonas más tobas en os dos estremos y que han colocau a CHA como un partido radical en o prexín d'a dreita y en o d'a cucha en un partido moderau y mesmo bertical. 

O bideo que ha pasau CHobenall tiene os suyos comentarios pero tos conbido a bier as imachens, mientres o mitin continaba en a plaza de toros.

Etiquetas: CHA, chobenalla, eleuzions, mitin, inzidens, Aragón

Dende o prenzipie d'a campaña quereba fer un chiquet estudeo sobre os programas eleutorals a las eleuzions aragonesas en rilazión con l'aragonés y o catalán que se charra en Aragón. O programa ye o mirallo de a postura d'os partius y d'a importanzian que li'n dan a un tema. Iste ye o resumen d'ixo que prometen en o programa y que cal que dimpués d'o diya 27 s'aiga d'obligar a cumplir a o partiu/partius que en ganen y que gubiernen.

Nomás he feito l'estudeo  sobre os zinco partius con posibilidaz reyals de dentrar a las Cortes d'Aragón. Y ta cumplir con a lei eleutoral (a la que i soi ficau como blog) en foi o recorriu de más chicot a más gran.

IU 

Cosa. No i diz cosa d'as luengas d'Aragón. Ni en politica cultural ni educatiba.

PAR

O Partiu Aragonés Rechionalista (que ha estau en o gobierno d'Aragón os zaguers 16 años) diz que ferá cumplir a Carta d'as Luengas Rechionals y que ferán una lei de Luengas y Fablas d'Aragón. Sin dembargo, no diz cualas son as luengas y cualas as fablas, amás de asegurar que no bi abrá politicas normalizadoras.

Cumpliremos y feremos cumplir a Carta Europea d'as Luengas rechionals o minorizatas, con l'ochetibo de

    -Alzar y fomentar as luengas y modalidaz lingüisticas en os puestos an se fablan.

    -Afaborir o suyo uso oral y escrito en l'ambito publico como educazión, chustizia, almenistrazions y serbizios publicos, meyos de comunicazión y cultura

    -Meter os meyos que premitan l'aprendizache y l'estudeo d'ixas luengas en os rans educatius, prenzipiando dende pre-escolar.

Promoberemos a Lei de Luengas y fablas d'Aragón, partindo d'a boluntat d'os fablans y de que n'esista consenso sozial, por tanto sin politicas normalizadoras.

CHA

Ye o partiu que fa más esclatero o suyo refirme a una lei de Luengas, asinas como o suyo reconoximién a la reyalidat linguistica trilingüe en Aragón. DE feito, fa un trestallo espezial adedicau a la politica lingüística. Amás de fablar de politica educativa, sozial y cultural. Fa tamién a recomendazión d'incluyir en l'estatuto un reconoximién esclatero d'a reyalidat trilingüe aragonesa.

Reconoxer a reyalidat trilingüe d'Aragón y os dreitos d'os fablans y comunidaz d'as dos fablas minorizatas, aragonés y catalán, asinas como as suyas modalidaz.

Rebisión d'o tratamiento que os libros de testo da a lo Aragonés, y tamién ás suyas luengas.

Desembolique d'una politica lingüística que guaranzie l'uso y l'amostranza d'as nuestras luengas, y, en concreto, de l'aragonés y o catalán en os terminos d'o Diutamen sobre politica lingüistica.

         En o trestallo de Politica Lingüistica

-Empentar dende as instituzions (...) l'aprebazión de una lei de luengas: guaranzie os dreitos (...) a emplegar a suya luenga en toz os ambitos, empente o suyo emplego en os meyos de comunicazión de titularidad publica. (...) Fazilite o suyo estudeo y normalizazión, su amostranza efeutiba, promozión y azeutazión sozial. (...) Creyazión d'un organismo consultibo de referenzita t'as Almenistrazions publicas aragonesas y establir un sistema d'acreditazions de conoximien d'aluenga ta profesors, ziutadans y funzionaires.

-Cumplimiento d'a normatiba sobre señalizazion y retulazión bilingüe d'as bias urbanas, carreteras, lugars, etzra. dende os conzellos y redoladas, asinas como a recuperazión d'a toponimia tradizional y l'esbielle d'o nomenclator cartografico d'Aragón y totas as atras disposizions legals en bichenzia en materia lingüistica.

-Fer campañas d'informazión, sensibilizazión, conzienziazión y dinnificazión en tot o país. Refirmar os Centros d'amostranza dentro d'o marco de politica educatiba.

-Establir mecanismos de promozión de l'uso sozial.

-Establir dende o Gobierno d'Aragón o, dende conzellos y redoladas a figura de l'Asesor linguistico local o comarcal (...) que preste asistenzia a cualsiquier ziutadán que aprezise d'aduya ta poder fer baler os dreitos lingüisticos.

 

PP 

O Partiu Popular en Aragón no charra de lei de luengas encara que si tiene bella referenzia a la reyalidat lingüistica, encara que sin charrar de luengas.

-Reyalizar un curriculo aragonés que guaranzie o conoximién d'a reyalidat aragonesa en toz os suyos ambitos (istoria, patrimonio cultural y natural, luengas, reyalidat sozio-economica.

-Rispetar as modalidaz lingüisticas propias d'Aragón y a suya considerazión como bien cultural enriquidor, guaranziando a suya amostranza, como asinnatura optatiba, en as zonas d'emplego cutiano.

 

PSOE

O Partiu Sozialista Obrero Español en Aragón nomás fa una promesa (dimpués de 8 años en o gobierno y aber-ne feito barias de promesas, ya)

-Aprebar en o primer año de lechislatura a lei de luengas.

 

Etiquetas: aragonés, campaña, eleuzions, elecciones, catalán, luengas, programa, PAR, PP, PSOE, IU, CHA

Una begada que ya sapemos os risultatos d'as eleuzions, y como que Marcelino Iglesias será probablemén o presidén de Aragón, cal remerar a suya zaguer promesa. En iste primer año de lechislatura abrá d'aprebar a Lei de Luengas.

Cal espardir iste mensache. Que cumpla as suyas promesas.

Etiquetas: promesas, aragonés, Aragón, PSOE, Gobierno, Lei

Como dezibamos ayer , rezentaba él en una entrebista y leba en o suyo programa eleutoral, o probable prosimo y repetiu presidén d'Aragón tiene a intinzión de aprebar a lei de luengas en o suyo primer año de lechislatura. Como que as promesas d'os politicos, y más que más as de Iglesias, las se leba l'aire, que millor traza de remerar-las que bestir-las argüellosos por o país, por as suyas montañas, campos y planas. As chambretas que podez beyer astí alto son o zaguer diseño de Purnas Botiga , an podez trobar atros polius diseños y an profés, podez mercar as chambretas que ferán una epoca. A epoca de l'aprebazión d'a lei de luengas. Sisquía no siga de menimos, como puede estar.

Etiquetas: aragonés, catalán, botiga, purnas, chambretas, Iglesias, promesas, Aragón

He leyiu i m'ha plegau ista informazión ta ista tardi.

Quiestos amigos:

Dimpués d'a resaca eleutoral y d'o ziclo "Alcaldes" en o Casco Biello, reprenemos o nuestro ritmo d'autibidaz y proposas bariadas ta os bezins d'o bico y ta la resta d'a ziudat.

Proyeuzión d'o documental
"El RUMOR DE LA ARENA". Sobre a situgazión d'o Sahara Oczidental, rezién feito o suyo estreno en o Festibal Entrenazional de Zine d'o Sahara.

Diálogo con o co-autor
DANIEL IRIARTE, Periodista

Diya: Chuebes, 31 de Mayo de 2007
Ora: A ras siete y meya d'a tardi

Puesto: C.San Pablo 23, baxos
Organiza: Asoziazión de bezins Lanuza-Casco Biello.

Etiquetas: Sahara, solidaridad, cine, documental, Zaragoza, Casco, Iriarte