Y a sor podió con o pollet. D'un tiempo, y d'un puesto. D'una mesa d'o minchador que no se podeba ubrir sin de periglo, y d'un sofá con flors fiero. Purnas en l'aire, en o biento...y en o conbento.

Etiquetas: purnas, bideo, moncha, nun, chicken, pollo, pelea, fight

Me plega un correyo ayer de una estudián de Filolochía romanica en Cataluña y blogger (encara que no se que blog). Me fa preguntas sobre os blogs en aragonés. Suposo que no estoi l'unico, pero quiero ficar aquí as preguntas, mientras me pienso la rispuesta y le'n torno. Me diz Elía:

Ye l'aragonés a tuya luenga materna? Piensas en aragonés?

S'amuestra en a escuela? Has feito bel curso?

En que contextos emplegas l'aragonés y en cuals o castellán?

Esiste bel trango meyo entre aragonés y castellán, un mezclallo?Lo emplegas?

Que prestichio tiene l'aragonés en Aragón ta os que no en fablan? Y ta os que si que en charran?

Como clamas tu a la tuya luenga?

Que fazió que escribises o tuyo blog en aragonés?

Que piensas de l'emplego de l'aragonés en os blogs?

Bi ha buena rilazión dentre os bloggers que escribiz en aragonés? Soz una comunidad chunita?

Leyes á ormino blogs que no son en aragonés?

Creyes que o lumero de blogs en aragonés ye crexendo? Qué futuro i beyes?

Etiquetas: blog, blogs, aragonés, encuesta, filolochía, fabla, internet

Ye l'aragonés a tuya luenga materna? Piensas en aragonés?

No, no ye a mi luenga materna, pero si de que de begadas si soi charrando de cutiano en aragonés, pienso en aragonés. Como me pasa con totas as atras luengas que charro.

S'amuestra en a escuela? Has feito bel curso?

S'amuestra en a escuela de "aquellas maneras". Bi ha clases optatibas en bel puesto, y mesmo bi ha lugars an se fa serbir como luenga d'uso dentre profesors y alumnos, encara que l'amostranza siga tota en castellán.

En que contextos emplegas l'aragonés y en cuals o castellán?

A berdat ye que ye defizil emplegar de cutiano l'aragonés. Tot depén de con qui fables. En o triballo, en a bida cutiana, emplego o castellán, en bellas rilazions y autibidaz l'aragonés.

Esiste bel trango meyo entre aragonés y castellán, un mezclallo?Lo emplegas?

No. Pero si que goso emplegar parolas aragonesas en o mio castellán. Más que más ixas que tota chen emplega. 

Que prestichio tiene l'aragonés en Aragón ta os que no en fablan? Y ta os que si que en charran?

Bi ha de tot. Ta la gran mayoría d'a chen ye una cosa "cultural" pero de más que más folklorika. Ta muita atra chen ye un inbento. Ta atros no esiste y prau. O grau de diglosia entre chen que charra ye gran. Bi ha muitos fablans patrimonials que piensan que ye cosa fiera y preban de no fablar en publico. Creigo que de totas trazas si que bi ha un creximén d'a conzenzia lingüistica d'os fablans patrimonials. Os neofablans creigo que tienen más platero o grau d'importanzia de fer perbibir a luenga.

Como clamas tu a la tuya luenga?

Aragonés. 

Que fazió que escribises o tuyo blog en aragonés?

Ye una manera de emplegar más de cutiano ista luenga y d'estendillar o suyo uso.

Que piensas de l'emplego de l'aragonés en os blogs?

Que no ye fázil porque tenemos una chicota audienzia, asinas que a chen que fabla l'aragonés li cuesta dar o trango de prenzipiar a fer o blog en aragonés.

Bi ha buena rilazión dentre os bloggers que escribiz en aragonés? Soz una comunidad chunita?

Yo m'escribo con bels d'ellos, pero con atros no. No bi ha un punto de trobada, encara que si que bi ha proyeutos.

Leyes á ormino blogs que no son en aragonés?

Profés que si. Como leutor de blogs si nomás leyese blogs en aragonés remataría prou luego. :D

Creyes que o lumero de blogs en aragonés ye crexendo? Qué futuro i beyes?

Creigo que si. Bi ha más, pero somos una comunidat una mica discontinua. Bi ha guaires blogs que aparixen y disparixen. Pero imos china chano crexendo.

Etiquetas: aragonés, blog, blogs, encuesta, Aragón, Internet

Iste domingo en 60 minutos en Aragón Televisión, a las 19.35 (mesmo tamién por satelite) s'emite "Crexendo en aragonés". Una gambada por o Pirineo aragonés grabando a niños fablando en difrens bariedaz d'a luenga aragonesa. Dende l'aragonés cheso en l'oeste, dica l'aragonés benasqués o patués en l'este. O reportache estió grabau o pasado mes d'abril y ha estau reyalizato por Jorge Romance y Sergio Almárcegui. 

"Crexendo en aragonés" s'emite amás, coinzidindo con o 25 cabo d'año d'o Ligallo de Fablans de l'aragonés, que se zelebra iste domingo. O reportache muestra a reyalidat d'uns ninos que, redolados d'estimulos en atras fablas, encara alzan a luenga d'os suyos pais y lolos, y l'esfuerzo de pais y educadors por ebitar que se tresbata iste patrimonio cultural de toz os aragoneses, y seguntes a Carta d'a Unesco d'as Luengas, de tota a Umanidat. L'aragonés ye a luenga europea más menazata de disparixión. 

Etiquetas: aragonés, Aragón, aragóntelevisión, televisión, 60M, fabla, reportaje

Iste domingo parixeba o diya de l'aragonés en Aragón Televisión. Puestar porque como no bi ha cosa de cutiano, ta tres cosas que se'n fan parixe muito. Aqui dixo bellas cosetas d'intrés. Por una banda a primer misa en aragonés, parada por Ligallo de Fablans.

Y por atra, una chiqueta notizia sobre "Creciendo en aragonés", que se ha emitido en Aragón Noticias 1 y que ye adebantando o reportache que s'emite d'aqui a zinco menutos en o 60 M.

Que tos faiga goyo.

Etiquetas: aragonés, misa, reportache, aragontelebisión, aragón, televisión, 60-M

Ayer como cosa eszeuzional, no xublidemos, bi'n abió muita informazión sobre l'aragonés en Aragón Televisión. Por astí baxo en tenez bels exemplos. Y agora tos dixo un par más. 

Por un costau o programa 60-M d'Aragón Televisión emitió o reportache "Creciendo en aragonés". O reportache, que estió aplazau fa unas semanas, sirbe ta contimostrar d'un manera normal, l'uso cutiano de l'aragonés en bels lugars d'o Pirineo, más que más por ninos. A penar d'a influenzia masiba d'o castellán y d'atras fablas como l'anglés en l'amostranza, os chuegos, y as rilazions entrepresonals.

Etiquetas: aragonés, aragón, televisión, niños, 60M, reportache

Aprobeitando as nuebas potenzialidaz de Spreadshirt, soi fendo cambeos en a botiga. En iste inte bi ha un par de nuebos diseños y una intresan nobedat. As chambretas se pueden demanar agora en o color que se quiera, a o marguin d'o color con que sigan feitas. Aprobeita agora ta demanar as nuebas chambretas y continar amostrando palmito , rasmias , suenios y asperanzas en l'estiu que prenzipia. Remera amás a  Marcelino Iglesias as suyas promesas .

Biene-te-ne enta  Purnas Botiga , www.purnasbotiga.com y siente o goyo d'o diseño purnas ta l'estiu. Por ziertos, as chambretas son reyals y se'n demanan direutamen en Purnas Botiga. Plegan en un par de diyas y se'n fan por demanda, una a una, por o que lo pre ye pro achustau.

Etiquetas: purnas, botiga, ofertas, camisetas, verano, novedades

Ye o camín que no n'he feito. Por ixo, atamás de que o bus teneba nomás 60 posientos yo lebaba o numero 62. Una no-tornada. Un no-biache. Un querer quedar-ie y marchar-ie a la begada. Ye un camín que se'n torna, que torna, que esnabesa disiertos mentals y fisicos. Ye un camín que no ye un camón, y an la mosica de Pink Floyd quedaba perfeutamén iste maitín. Tamién Fermín Muguruza, Extremoduro, Creedence, Ismail Lö, Platero, Miquel Gil. En un camín caben muitas parolas, puestar que dica algunas prou duras como as de Miguel Amorós en "Golpes y Contragolpes". Y en o fundo, o disierto. Y en o pasau, o pasau, y en l'esdebenidero puestar o pasau o puestar no. Dimpués de plegar enta Zaragoza belún m'ha dito: "Somos ninos que prebamos de superar as cosas tresbatitas d'a infanzia". Bibimos pensando futuros y remerando pasaus. Y de begadas, ha dito R., de begadas xublidamos bibir o presén". Entre deseyos, wishes, y remers, remembers, xublidamos que cada diya tiene a suya faina, como deziba ixatro. Y que nomás soniar, pensar, creyer, prexinar y rebelar no sirbe pas. Tamién cal bibir. En soi tornau. Una begada más. 

Etiquetas: barcelona, zaragoza, autobús, alsa, monegros, disiertos, utopías, presén, pasau, esdebenidero

Solstizio. Fuego. Fogueras. San Chuan. Sanchuanada. Cremar. Pretar fuego. Purnas. Á ormino. Mai. Nunca. Mitat de cosa, mitat de tot. Un diya que i soi aquí, pero que abeba d'estar-ie en atro puesto. Un año en Granada, en Cala Cortina, en Barzelona, en mil mundos a la begada. En mil presonas a la begada. O mio paper ye escrito. ¿Quiero cremar-lo?. Tot ye en o zelebro. Ixo d'o paperot ye o de menos.

Etiquetas: San, Chuan:, hoguera, fuego, solstizio, estiu, primabera

Etiquetas: San, Chuan, foguera, fuego, solstizio, sanchuanada, estiu, primabera

Dani ha creyato un planeta Netvibes con os blogs en aragonés. Tos podez apuntar aquí. Son muitos d'os blogs en aragonés os que amuestran os suyos contenius en ista ferramienta. Asinas que ye un trango más ta la normalizazión de l'uso de l'aragonés en o rete. Por zierto, que netvibes , como tantas atras cosas, son asperando chen ta traduzir os suyos contenius a ista luenga nuestra.

Netvibes ye un serbizio web que autua a mena d'escritorio birtual, parellano a la pachina prenzipal presonalizata de Google.

Etiquetas: netvibes, aragonés, planeta, internet, serbizio

O Bloque Alternatibo , formato per diferens collas LTGBQ y presonas arroclatas arredol d'una asambleya en Madrí, te combida a partezipar n'a suya manifestazión cretica y disidén confinando con a zelebrazión d'a esfilada "Europride-Argüello Uropeyo" en Madrí lo benién sabado 30 de chunio.

En o pasau Argüello de 2006, ya bi salimos a ras carreras de Madrí como Bloque Alternatibo ta fer esclatero ro nuestro desalcuerdo con o modelo mayoritario de "esfilada" que añada dezaga d'añada se mos imposa. En 2007, creyemos encara màs amenistable debantar a nuestra boz debàn d'una clamadura como la de l'Europride que, combocata por un rolde interpresarial multinazional, promuebe encara màs as balguas y models LTGB reformistas y mercantils con os que mos amostramos en desalcuerdo. Por ixo propasamos reprener un esprito de protesta y mobilizazión que, sin renunziar a lo caràuter borinero d'una zelebrazión colorista y goyosa, no pas ixuplide las reibindicazions contra ra descriminazión y la inestraficanza que permenamos por enchaquia d'a nuestra opzión secsual.

Tot lo manifiesto lo tenez aquí

Etiquetas: europride, gay, argüello, madrid