Esteso quiere continar con a suya carrera

Dimpués d'os grans esitos mosicals que suposaron temas como "La Ramona", en que Fernando Esteso feba critica ironica d'os topicos sobre os abitadors de lugars, bulgo "pueblerinos", l'autor aragonés ha dezidiu fer un trango más en a suya carrera profesional y prenzipiar a fer de produtor de contenius ta la Telebisión Autonómica Aragonesa. Amás, carauterizato á ormino por o suyo compromiso sozial, por exemplo, contra a ludopatia en filmes como "Los Bingueros", Esteso ha quiesto fer un zeño a os fablans de luengas minorizatas d'o país, antismás clamau rechión.

Seguntes ha puesto saber Purnas en aragonés, Fernando Esteso ha preso lo control de a productora "Esteso de Produzions ", antis clamada Filmax. A partir d'o mes de otubre, conzidindo con o Diya d'a Ispanidat, Esteso de Produzions prenzipiará o rodache de "Yo fazié a o cocho de (San) Roque III", an se recreyará a bida d'antismás d'un lugar d'o Semontano de Balbastro, y os problemas que causa a plegada de un ziento de inmigrans de Linares (España), que no replecan cosa en o zereño azento d'os abitadors.

Aimors, luitas, barallas, borinas, zorreras y bingo, en un telefilme de 130 oras de durada, y que s'emitirá en prime time por a telebisión rechional aragonesa. O filme se rodará integramén en aragonés, diauleto semontanés, fueras d'as interbenzións d'os inmigrans, que charrarán en andalú, encara que estarán chustitulatos ta que toz podamos replecar as suyas grazias y mazadas. Que en tienen, seguro. A produtora no ha descartau que o mesmo Fernando Esteso siga o protagonista más destacau, en o papel de San Roque III, santo penchau d'un altar, pero que baixará ta fer fiesta y ta zorrupiar bin, asinas como ta amostrar aragonés a os inmigráns. As dificultaz con o fonema /x/ y os articlos determinatius estarán un d'os grans exes zentrals d'o guión.

A produzión costará entre 1 y 6 millons d'euros, depende de si a Expo 2009 patrozina o filme o no. Cal remerar que a Expo 2009 ye un ebento encara por conbocar y que consistirá en o despieze de l'azud de l'Ebro dimpués de ser arrozegau por a riada primaberenca d'abril de 2008. En Expo 2009 tot chirará arredol d'a biella cultura de l'augua y tot lo que no cal fer ta que as grúas se multipliquen en as montañas d'o país nuestro. Fernando Esteso ye prebando agora de contar con ixe patrozinio, porque sino, parixe que os presonaches secundarios podeban estar feitos por güellas, ixo sí, de rasa aragonesa.

#Iste post de broma sirbe, entre atras cosas, de remeranza de Fernando Esteso que güei rezibe o cariño d'a blogosfera aragonesa. Sisquía sabese por qué.