O Pirineo que no ye Pirineos Sur s'achunta en Echo y Aragón TV no lo beye

Puestar porque en Echo se fablan luengas que no esisten. PUestar porque se presentan libros que  charran de pantanos que matan lugars. Puestar porque se beye astí que as mugas no sirben cuan se'n charra de presonas. Porque bi ha pueblos que resisten con a suya cultura y as suyas tradizios a pesar d'as leis. Porque bi ha chen que encara creye que atra montaña ye posible. Puestar porque ya son nueu begadas que se'n ha prometiu ixa lei de luengas y a de montañas. Puestar porque bi ha entibos que continan amenazando a atros lugars. Y a pesar d'ixo os pueblos, toz, catalans, ozitans, bascos, aragoneses, toz, cantan, arriguen, suenian, chugan, biben, bailan y sienten.

Puestar por tot ixo, a telebisión autonomica d'Aragón dezidié que no eba guaire motiu ta puyar enta Echo a grabar o PIR'07. Puestar porque no muebe guaires diners como o Pirineos Sur. U porque a reyalidat d'o Pirineo que amuestra, pegada a la tierra y a os alazez, no dentra en l'esprito d'a lei d'a Corporación Aragonesa de Radio y Televisión, ixa que diz que tiene dentre os suyos ochetibos.

-O rispeto a la pluralidat politica, cultural, lingüistica, relichiosa y sozial.

 

-A promozión d'a cultura aragonesa, asinas como d'as barias modalidaz lingüisticas. 

Puestar por ixo. Ta os que en estioron y os que no estioron un chicot resumen, mal grabau, mal editau, mal editau, y limitau en espazio y tiempo. Encara no s'ha feito de nuey ta iste atro Pirineo que no tien de mugas, pero si de culturas, que charra en más luengas d'as que mos quieren fer beyer. A mi, que soñaba con el mar.