Meme d'o 75 cabo d'año d'o Reyal Zaragoza

Me pasa Fernando un meme agora que fa 75 años que naxió o Reyal Zaragoza. O meme ye tarcual asinas, beyer o bideo que ha feito Hesaga (de Aupazaragoza.com ) y rezentar cual ye o gol que mas goyo te'n fa de toz os que ha feito o Zaragoza ta ganar tetulos.

 

 

Ye un reto, ye esclatero. Encara que m'abese feito goyo no podié bibir os esitos d'os Mannificos. Remero o gol de Rubén Sosa contra o Barzelona en 1986 en casa mía, dimpués de autuar en una funzión colexial en as fiestas. Dende astí, he bibiu con intensidat totas as finals chugadas por os blanquers y os suyos tetulos. Bibié empliu de goyo o tetulo d 1994. Un biache bestial en un tren "cargado de paletos" que dizió José Ramón de la Morena. La errada de Alejo, a parada de Cedrún y o gol d'Higuera. Encara alzo un trozet d'o Vicente Calderón que cayeba a cachos. 

En 2001 fazié 600 kilometros dentre chornada y chornada de triballo ta esluzerniar en minoría d'o partidazo de Aguado, y d'os gols de Jamelli, o mesmo Aguado y Yordi. En 2004, bibré como un barrenau con o golazo de Galleti en o Lluis Companys de Barzelona contra o Reyal Madrid. A borina por a ziudat s'estendilló dica bien entrau o diya siguién y bels diyas dimpuées encara teneba un sonriso fato en a cara.

Pero o gol que encara me pone os pelos tiesos, cuan lo beigo, l'ascuito, cuan en charro. SIempre. Y a penar d'o primer gol de Esnaider en ixa final d'o 1995, ye o gol de Nayim. O millor gol que nunca s'eba marcau en una final. POr o tiempo, por l'inte, por o ritmo, por a parabola, porque fazió crexer una locura coleutiba como no creigo que se'n torne a bibir. Ixe gol fazió uno d'os millors momentos d'a mia bida. Nomás uno, porque han abiu muitos, y muitos que no tienen cosa a beyer con o futbol, profés. Pero cuan o pelotazo de MOhamed Ali Amar, Nayim dentró por a escuadra de David Seaman, nomás podié deseyar que o tiempo s'aturase. Asti bi yera bella cosa prou parellana a la felizidat. Por mi y por toz os que m'arredolaban. Ixe gol lo lebo ficau en bel puesto d'o mio corazón, d'a mia anima, d'o mio zelebro. Ixe inte, l'inte dezisiu. O gol que fazió posible pochons imposibles. O gol que benió d'o zielo. 

Paso el meme a Jesús , Dani, Rondabandarra y a Antonio Tausiet , pero por joder un poco. jeje.