Probinzianismo en o Zentro d'Istoria de Zaragoza

L'atro diya beyié "El Club " en TV3. Cada año fan una entrebista a José Antonio Labordeta. Ista añada fendo zapping plegué a beyer-lo. Dizió cosas intresans, atras no, y muitas dibertidas. Aneudotas en o parlamento español, de carrera. A Labordeta le fa goyo fer gambadas por as carreras, y s'en troba a chen que li responde de trazas curiosas y difrens. En o goyo de pasiar ye descubrir, beyer y tastar o ritmo d'a ziudat. DIzió Labordeta que Zaragoza y Barcelona son dos ziudaz goyosas a l'hora de pasiar. Dizió que a pesar d'o suyo creximien y a suya empenta (más Barcelona que Zaragoza), yeran ziudaz que alzaban bel probinzianismo.

 

En castellán diz la RAE que probinzianismo ye: "Estrechez de espíritu y apego excesivo a la mentalidad o costumbres particulares de una provincia o sociedad cualquiera, con exclusión de las demás.". Yo sé, o prexino, que Labordeta quereba dizir que en Barcelona o Zaragoza encara s'alza l'esmo d'a ziudat que se conoxe a si mesma y bibe una mica cara si mesma. Sin sentiu peyoratiu. Pero, de begadas, tiengo a sospecha que ixo d'o probinzianismo dito de Zaragoza ba muito más enta allá. L'atro diya estié beyendo a esposizión sobre Ramón y Cajal en o Zentro d'Istoria de Zaragoza. Una esposizión bien esplicada, bien feita, con muito material curioso que y que ufre una ambiesta ampla d'un ombre d'o Renaximién naxiu en o sieglo XIX. Zientifico, medico, quimico, pintor, escritor, fotografo. Un fillo d'Aragón naxiu en un lugar de Nabarra. Y digo que l'espo yera bien esplicotiada porque se leyer castellán.

 

Garra d'os cartels de la esposizión o d'o mesmo Zentro yeran en atra fabla que no estiese o castellán. Cada begada en bienen más turistas que no tienen o castellán como luenga cutiana. Sin dembargo, si fan por beyer una muestra sobre un d'os presonaches aragoneses más importans, no pueden fer-ne y nomás podrán beyer os moñacos. Probinzianismo puro y duro. En Barzelona, que conbiben en dos fablas, y con chen que ba y biene de toz os puestos d'o mundo, totas as esposizions son feitas en a lo menos tres luengas. Catalán, castellán y anglés. Comunicando-se con o mundo. Sin dembargo, aqui no emos feito ixe trango encara, y parixe que nomás queremos que en bienga chen d'aquí o d'allí a los que femos d'aquí. Y encara bi abrá bella presona que dizirá o castizo "Pues que aprendan". Profés, de l'aragonés y d'o catalán ni en charramos.