A lei de luengas y os problemas

M'entero por Aragoneame que Biel diz que a lei de luengas d'Aragón podrá creyar problemas con Cataluña. No ye garra cosa nueba sobre tot si en fer a lei de luengas fan caso a FACAO, integraus en o PAR muitos d'os suyos representans. No ye que tendrán problemas con Cataluña, tamién con a Unibersidat, con os filologos, con os fablans...en fin, con toz, menos con l'españolismo ranzio que representan.

Amás diz o Bizepresidén d'Aragón que a lei podria presentar-se dimpués de l'estiu. Fa no guaire Ramón Miranda, direutor cheneral d'Educazión, deziba encara que a lei estaria en as Cortes antis de l'estiu. O mesmo Marcelino Iglesias (asinas en castellano) deziba que en o primer año de lechislatura se aprebaría a lei de luengas. Unatra promesa incumplida. Ya fa más d'un año d'as eleuzions y queda poco ta que se faga o primer año de lechislatura, asinas que no ye probable (de feito, ye imposible) que s'aprebe a lei de luengas.

As declarazions de Biel ban una mica más entadebán. A Biel nunca no l'ha intresau l'aragonés, suposo que no tiene perras que quitar d'aquí. Puestar que siga ixo. Pero as declarazions ponen atra begada a lei de luengas fuera d'as nezesidaz d'os fablans, fuera d'o debate (si ye que cal) filolochico, y fica o tema, unatra begada, en a politica. En a zaguera lechislatura Marzelino no aprebó a lei de luengas por l'estatuto catalán (ya me dizirás). Agora son os biens de la Franja y o minitrescole ta Barzelona. Dimpués sera unatra cosa. Y tot ta aprebar una lei de luengas que naxerá muerta. Muerta porque no aclarirá cosa. Porque no obligará a cosa a dengún. Porque dixará fuera Zaragoza. Porque dixará que sigan os conzellos os que dezidan que fan. Una lei naxita muerta ta morir as luengas d'Aragón que no replecan.