Cada cuantos meses mos preguntan ( a 2000 d'os que mos dezimos  aragoneses, fueras de Salva Ballesta ). Que si tenemos problemas, que si no. Que si o terrorismo ye nuestro  problema. Que a  qui  botemos en 2003, a  qui botaremos en 2007. Ayer o Gobierno d'Aragón (España) , mos fazió publicos os datos d'o  suyo Barometro d'Ibierno. Toma ya. No fablo d'as encuestas eleutorals. Ta qué. Ya en charran atros, y en mayo pasará o que mos bufe a pocha a os que boten y a os que no. Pero sí de datos que no amanixen en o que publican os meyos. Ye una pregunta tipica, que ha cambeato de conteniu porque no intresan bellas rispuestas. Ye una pregunta dica que grau somos o que somos .

D'os datos que tiengo. Un 21'8% d'os preguntatos son antis que atra cosa, aragoneses. Un 14% españols. Y un 55% aragoneses y españols a o mesmo tiempo. Antis tamién preguntaban por si te sentibas nomás español o nomás aragonés. Dimpués una pregunta maxica. ¿QUé creye que ha d'estar Aragón?. Un 4'4% dize que una rechión sin de autonomía. Grans y libres. 23'5, piensan que una comunidad autonoma igual que agora. Un 45'5% una Comunidat autonoma con mayor numero de competencias. Nomás un 15% quieren esdebenir como Cataluña, Euskadi o Galiza (agora enamplaus a cuasi toz menos Aragón con l'estatutico). Menos encara, un 1'7% d'os encuestatos creyen que Aragón ha de estar un país independién. Ye dizir que un 60% a lo menos quieren un alto grau de competenzias. Tamién son muitos, más de un 80% os que creyen que Aragón pinta poco en l'Estau Español. Ye dizir, que bi ha un 20% que quieren que Aragón contine pintando poco. Sobre tot con a pregunta sobre l'estatutico. ¿En l'esdebenidero, que piensa que pintará Aragón?. Igual. Un 80% piensa que pintará igual o menos.

En tot iste xambre de datos bi ha cosetas que no acaban de cuadrar. Sapemos que pintamos poco. O pensamos y en sufrimos. Pero continamos botando o mesmo. Y nomás ixo, sino que amás mos parixe poco importán aconseguir un millor grau d'autonomía. Un chicot 60%. Bi ha un 40% d'aragoneses que se piensan mindundis. Y que quieren continar estando mindundis. Por muitas campañas d'imachen que faiga (a menos de mes y meyo d'as eleuzions, radendo a ilegalidat) o des-Gobierno d'Aragón.

Etiquetas: Aragón, gobierno, nazión, barometro, encuesta, opinión

Plega a primabera de 2007 y plegan as eleuzions. Plegan as encuestas, os barometros. I plegan os calors. Os primers tirans, as ganas de fer gambadas en bezicleta. Mesmo as ganas de no estar triballando. Puestar por o cumulo de cosas que plegan en primabera. As eleuzions, os tiempos eleutorals y os barometros. Fa dos años en TV3 dizión no a rispetar os tiempos eleutorals, y querión guidar-se por a nezesidat informatiba. My God!!. Un meyo de comunicazión guidar-se por a nezesidat informatiba. An puede beyer-se cosa como ista?.

Guei consiento en "primaberar". Ta yo, ta os atros. Ta os capullos, que bi'n ha. A os florius, tamién. A un mundo que beye a muerte con guellos de baca. Guei en una alcantariella, en un mercau, en un lugarón indio, en u tren. En cualsiquier puesto...y mientres...

Ella leyiba un libro a o canto d'a muralla. Alzada d'o rudio. Alzada d'o sol. Alzada d'a guembra. Alzada d'o mundo. Nomás bi eba que letras, una mente, uns güellos, unas garras perfeutas, y una tufa que cal recollir cada guaire. Sonaba a Creedence Clearwater, y en ixe inte preziso, o mundo, nomás o mio mundo, tenió una mica de sentiu. Dimpués me guelló. Yo fazié un sonriso. Allora sintié o soniu d'o bus. Dentré por a puerta d'a telebisión. Caos.

Etiquetas: primabera, eleuzions, encuestas, media, meyos, güelladas, tiempo, orache

Güei ye un diya triste. Partido ¿Aragonés? y os tres partius españols con presenzia en o nuestro país, apreban güei a sumisión colonial d'Aragón y o deszenso a 3ena dibisión. A ixos botamos. Grazias, amigos. Un motiu más ta emigrar atra begada. 

Etiquetas: Aragón, estatuto, PAR, España, BIel, Traizión

Plega de nuebo (nunca no plegó iste ibierno) o biento, o fredo. Plega o lunes, unatra begada. Plega a rutinaria bida moderna. Plega o zerclo que mai no acaba. Plega una nueba etapa de sequía produtiba. O no. Por si de caso, comprebar como bels creatius preban de aturar que difundamos o conoximién. Buen lunes ta toz. 

Etiquetas: mp3, SGAE, p2p, emule, copia, canon

O Partiu Popular español en Uesca fazió saber ayer "a suya intinzión" de denunziar a la colla musical teruelana "Los Draps " y a barias instituzions por refirmar-lis, en considerar que os ganadors d'o Zaragoza premio Aragón Musical a canta en  luenga minorizata aragonesa . A unica actitut antidemocratica ye a d'o propio PP por prebar de fer eleutoralismo zensurando opinions y atacando a asoziazions como Aragón Musical que nomás preba de refirmar a creyazión mosical d'o país.

Remera o comunicau de Antonio Torres, d'o PP-Uesca a os comunicaos que en istos años ha sofriu a colla basca Soziedad Alkoholika y que obligoron a la suspension de conziertos por o miedo de bels conzellos a achustar-lis. Dimpués l'Audienzia Nazional española abió d'absolber a S.A. por considerar que as suyas cantas no biolaban garra lei. Agora o PP-Uesca preba de fer o mesmo con una colla cuyo unico fin ye dinnificar una fabla, o catalán, y una tierra, o Matarranya, xublidatas en cheneral por a mayoría d'os aragoneses y por a prautica totalidat d'as instituzions nazionals. 

Dende aquí o refirme d'iste blog a Los Draps y a os premios Aragón Mosical y a l'asoziazión que bi'n ha dezaga. I per suposat a la estimada llengua en que canten Los Draps. No mos fareu callar.

Etiquetas: Draps, Aragón, zensura, PP, libertat, Matarranya, catalan, catalán

Me pasa Fernando un meme agora que fa 75 años que naxió o Reyal Zaragoza. O meme ye tarcual asinas, beyer o bideo que ha feito Hesaga (de Aupazaragoza.com ) y rezentar cual ye o gol que mas goyo te'n fa de toz os que ha feito o Zaragoza ta ganar tetulos.

Ye un reto, ye esclatero. Encara que m'abese feito goyo no podié bibir os esitos d'os Mannificos. Remero o gol de Rubén Sosa contra o Barzelona en 1986 en casa mía, dimpués de autuar en una funzión colexial en as fiestas. Dende astí, he bibiu con intensidat totas as finals chugadas por os blanquers y os suyos tetulos. Bibié empliu de goyo o tetulo d 1994. Un biache bestial en un tren "cargado de paletos" que dizió José Ramón de la Morena. La errada de Alejo, a parada de Cedrún y o gol d'Higuera. Encara alzo un trozet d'o Vicente Calderón que cayeba a cachos. 

En 2001 fazié 600 kilometros dentre chornada y chornada de triballo ta esluzerniar en minoría d'o partidazo de Aguado, y d'os gols de Jamelli, o mesmo Aguado y Yordi. En 2004, bibré como un barrenau con o golazo de Galleti en o Lluis Companys de Barzelona contra o Reyal Madrid. A borina por a ziudat s'estendilló dica bien entrau o diya siguién y bels diyas dimpuées encara teneba un sonriso fato en a cara.

Paso el meme a Jesús , Dani, Rondabandarra y a Antonio Tausiet , pero por joder un poco. jeje.

Etiquetas: RealZaragoza, meme, campeons, zaragozismo, cabodeaño, anibersario