Pienso istos diyas sobre a mia autitu debán d'o mundo. "Garra cosa ye blanca ni negra", me deziban ayer. Y ye zierto. Ayer dezié que no. Pero porque soi asinas, nomás que me dizen una cosa ta dizir lo contrario. Esprito de contradizión, puestar. Pero ixo ye pose. Dimpués riflesiono. Garra cosa ye blanca ni negra, profés. Tot i ye en una gran escala de grises. Tan graniza que no bi ha guaires grises ta definir tot. O truco ye en saper colocar-se en ixos grises. Y saber que sí que bi ha cosas blancas y negras. Si de bella cosa soi luen ye d'a moral cristiana "d'o malo y o bueno" y de absolutismo d'a moral, pero fueras d'ixo sí que creigo en bels balors absolutos.

Pero l'esprito cretico tiene os suyos problemas, ye esclatero. Y de begadas no premite meter o foco en o suyo puesto. Pero sin dembargo, creigo que una bisión cretica premite concarar a reyalidat con una mica más de criterio. Porque, y astí biene un error común, esprito cretico no ye malmeter tot. Esprito cretico ye tenir os guellos ubiertos ta beyer a reyalidat no como un feito inamobible. Tot ye ocheto de amilloramiento. Tot ye posible cambear-lo.

Dizir si, como mardans, as reyalidaz que mos imposan no ye beyer as cosas en gris. Ye, simplemén, no saber analizar a reyalidat. Profés, toz tenemos o nuestro propio güello, formau por oras, diyas, semanas, meses y añadas de bibir, de estudear, de aprender, de conoxer, de saper. Ixos filtros son os que mos fan situgarnos debán d'a nuestra propia escala de grises. Dende allí, y siempre con esprito de construzión, se puede beyer que, por exemplo, o progreso no ye esautamén o mesmo ta toz. Sisquiá ye bueno per se. Bi ha bels progresos que son nomás trangos entazaga.

No quiero fablar d'o progreso. Ni pontificar, ixo ye ta Benedicto. Quiero rechirar dentro de yo ta beyer o mio puesto en o mundo, a mia propia güellada, a mia propia postura. Maitín, sobre o periodismo, atra begada.

Etiquetas: Bisión, media, periodismo, cretica, opinión, reyalidat

O periodismo biello ya ye muerto. Con ista frase conestaba a un mail que me nimbiaban dende Barcelona. Y no, no quereba dizir que agora as nuebas teunolochías han creyau un nuebo periodismo. No en fablo d'o periodismo sozial, sisquiá d'o comunitario, d'Internet como meyo de comunicazión de masas. En fablo d'o periodismo antigo, aquel al que ripresentan Julio Camba , Pla, Larra y atros. O periodismo antogo s'esferenzia d'o moderno por muitas cosas. Por l'emplego d'o luengache. Alazetalmén. O cudiau total y rispetuoso rispeto por as parolas, a luenga, no ye en o periodismo de güei. Exemplos bi'n ha a zentenars, y ye esclatero, as Facultaz de Periodismo no amuestran a escribir. 

O periodismo antigo teneba güellos ubiertos. ¿Por qué? Porque no n'abeba gabinetes de prensa. O periodismo antigo yera denunzia. No yera rispeto por as instituzions. Y, ye desicunsau, no confitaba en as instituzions publicas. Cosa que agora ye cutiana, amás que agora no pende d'as instituzions, ye cosa de qui la gubierne. Nomás cal beyer qui, como y por qué dize agora ixo que no dizió fa tres diyas con o puen de piedra, Yesa, A Romareda, o Tranbía, l'alta belozidat... Os meyos no rechiran rispuestas en a reyalidat, sino en a reyalidat que mos benden. No ye a primer begada que en charro d'isto, ni estará a zaguera. D'ixo que dezibamos deontolochía.

Pero m'aganaría beyer que puesto tiengo yo en tot iste embolique. Como aplico as mias creyenzias, as mias ideyas, as mias teorias, o que leigo, o que beigo, o que bibo y o que escribo en iste periodismo nuebo. Ixe que no rezenta istorias sino que copia as notas de prensa. Ixe que ba dezaga d'o toro. Ixe que no descubre, sino que encubre. Ixe que amuestra as caras d'os presuntos culpables y da os suyos nombres siempre que no sigan politicos. Ixe que siempre ba dezaga d'os gabinetes.

Y por l'inte i soi en o puesto que puedo. Prebando de parar cuenta con o luengache. Parando cuenta de no falseyar a reyalidat. De rechirar atras caras y atras istorias. Protestando cuan creigo que se'n creban a etica y o codigo d'a profesión. Toz rematamos cayendo en ista rueda de mentiras, y meyas berdaz, y berdaz y meyas mentiras que ye o periodismo moderno. Y o caso ye que no  ye fazil. O caso ye que l'esprito cretico tamién me adibe a yo mesmo. Contino en a inmersión en yo mesmo. Ya cal.

Etiquetas: media, noticias, periodismo, deontología, camba, pla, periodista, jorge, romance, jorgeromance

A biquipedia ha cambeato o suyo diseño por un más parellano a o que tienen atras "Wikipedias". Podez trobar as nuebas funzionalidaz en http://an.wikipedia.org/wiki/Portalada.

A edizión en aragonés d'a Wikipedia en tiene más de 6.500 dentradas y amás rispeta as bariedaz diauleutals de l'aragonés, ya que a portalada puede beyer-se'n en ansotano, belsetán, benasqués, cheso, chistabín, fobano, ribagorzano, sobrarbés y tensino.

Grazias a toz os que en colaboran.

Etiquetas: wikipedia, aragonés, biquipedia, enziclopedia, fabla, luenga, internet